تسمعوا وقروا جديد الطرايف = فرايد المعنى على حق ومصيب

يازين صورة نايف بالصحايف = إن قلت حر من شطار المخاليب

حر الحرار وطالع له شوايف = وإن قلت أسد يضرس بناب المغاضيب

وإن قلت قايد قوم للقوم شايف = وإن قلت شيخ من خيار المعازيب

الهم عالي والسراير نظايف = السعودة عنوان .. لاللأجانيب

وشلون يلقى للسعودي وظايف = يهدف يحققلك جميع المطاليب

المنصب النايف ونايف ولايف = ماهو غريب إن كان نصّبت تنصيب

ابو سعود يوم يبس الشفايف = سبع على الصيدات يلتف ويليب

كان الشجاعة بالأوادم خفايف = هو مودع الإرهاب شتى جناديب

شجاعته والله ماله وصايف = يدحم على جمع المعادي لياهيب

خلايف ياوي والله خلايف = نسل الشجاع اللي كفوفه معاطيب

اللي ولاها بالسيوف الرهايف = والعدل والإيمان والبذل للجيب

حبك تبنى بالضلوع النحايف = إيمر يجيك الشعب من غير تحسيب

الله لايرحم كديد الهدايف = جحادة المعروف شلات تخريب

اللي يبون الشعب حزب وطوايف = مافكروا وشلون تبقى العواقيب

أمن ولا بالشعب يبيت خايف = شعب موحد ماضي له تجاريب

في عهد منهو والمواطن حلايف = عبدالله اللي كمل الطيب بالطيب

وولي عهده كيف صافي وكايف = سلطان أبو خالد نزية الأشانيب