قصيدة بمناسبة تكريم الدكتور ناصر الرشيد - المقالات - سبق حائل | صحيفة حائل الإلكترونية

المقالات

كتاب سبق حائل

الشاعر : نواف نهير العلوي

قصيدة بمناسبة تكريم الدكتور ناصر الرشيد

بمناسبة تكريم الدكتور الشيخ / ناصر بن إبراهيم الرشيد قال الشاعر نواف النهيّر العلوي هذه الأبيات :

الحمدلله متين الحبل والحيلا
حمد عدد رمل طعسن كان متهايل

شبو لنا النار زيدو بالقناديلا
الليله الفال قايم صرت متفايل

دقو لنا الهيل سوقو للفناجيلا
والعود فوق المداخن وصف متخايل

وعرضات للصبح بالحدب المصاقيلا
حواتم يتثنى كل متمايل

الليله الليله الحفله بابن ليلا
ولع فرح وابتهج به ياسما حايل

كل الجبل مبتهج حتى المساييلا
في شوف ناصر تخيلنا الجبل سايل

دكتور ماتشبه ألا بنّة الهيلا
يابو اليمين النديّة شاربك طايل

دكتور ماتشبه إلا ضافي السيلا
يابو الجبين الذي لهمومنا شايل

من واجهك مرّة مايشكي الويلا
من مد كف يهول مدها الهايل

ماتقدر تغير أطباعك بتبديلا
الا تشوف الجبل عن موقعه زايل

مخلوق آية كرم من غير تعليلا
حاتم زمانك أنااشهد انشد القايل

دكتور ماجاء بنفسك تذبح الخيلا
يوم ان شمر تخطرك مع بني وايل

دكتور ياللي ترحب بالمقابيلا
ماتنهره بل بنفسك تاصل السايل

ياللحية الغانمة حصلت تحصيلا
علوم الشرف كلها لعنانها نايل

حقك على أهل الجبل للراس تقبيلا
مامثل ناصر لنا ياهل الجبل ظايل

يالله تمهل لابن ليلا بتمهيلا
يالله يالمعتلي ياسامع السايل

حجلان حايل ونعمك من رجاجيلا
ياصار يوم كبير والصفا سايل

والحمدلله بظل للمشاكيلا
اخوان الأنور ذرانا وان لفا العايل

حكم ابو متعب معدل مايل الشيلا
والعز في شوفته وعقاله المايل

وولي العهد قايد جيوش الأساطيلا
هو ذخرنا ياتحيزم والعدو صايل

ونايف ليا قام مايرضى لنا الميلا
نايف كما الحر الاشقر بالسما جايل

وسعود حايل سعدنا وافي الكيلا
لحايل مشاريع عظمى زيد ياكايل

وعبدالعزيز السعد وان صار تفعيلا
ياقف وفي ياتبين كل متحايل

وعبدالله الخالد التطوير للجيلا
تطوير تطوير في تطوير في حايل

وصلاة ربي عدد من يزهم التيلا
على شفيع البشر في يومها الهايل

...........................................................

الشاعر / نواف نهير العلوي الشمري

حائل 16 / 9 / 1430 هـ

نشر بتاريخ 09-09-2009