يالله يامنْشي مزون ٍ مراهيش=ياكافل ٍ رزق العباد ومعاشه
برحمتك تسقي ديار ٍ معاطيش=وتبلل ارض ٍ تشتكي من عطاشه
ونشوف هّلال المطر له نشانيش=في وسط قاع ٍ مبطي ٍ عن نشاشه
ديم ٍ ثلاث ايام يسكب رشاريش=حتى يصيب القاع منه الهشاشه
قبل الوطا تحيي قلوب ٍ مداويش=شوف المَحل سبّب كثير اندواشه
ويزول هم ٍ نهش القلب تنهيش=والبال يصفي من توالي خشاشه
ياما حلا شوف الحيا والمطاريش=بين الفياض اللي تصافق طشاشه
وياما حلا شوفة هداد اشقر الريش=إليا نصى خرب ٍ شديدن مهاشه
من فوق جيب ٍ مابدى به قراقيش=جيب ٍ هل الورشات ماجا قراشه
بديار بدون تعطي الروح تنعيش=شمـّة هواها زودت إنتعاشه
بدوان لامنـّك تنصيته تشيش=والناس تظهر ماخفى وسط جاشه
بدوان لو قلـّت عليها المعاويش=تكرم ولاتضرب حساب الإعاشه
بدوان ماتنشد سبب جيتك ليش=ولا يزيدون الحديث ونقاشه
مدهال لجموع الضيوف الطواريش=بوجيههم للضيف تلقى البشاشه
ومدحي لهم ماهو عن الغير تطنيش=كل ٍ على قـّده يقلط فراشه
والطيب بين الناس صعب التناويش=عسرن على الهلباج صلف ٍ مناشه
مايدركه خطو الدحوش المتانيش=أهل النميمه والعفن والدفاشه
ولاتدركه خطو العيون المغابيش=اللي عفنها زاد فيها غباشه
وختام قافي يالرجال الأشاويش=بيت ٍ أشوفه بين الابيات باشه
كان الهدف من عيشتك لقمة العيش=عز الله إنك مفلس ٍ من معاشه
وختامها صلو على صفوة قريش=نبينا اللي خير الاخلاق حاشه