"حاصلة على ترخيص وزارة الثقافة والإعلام"
RSS Feed Twitter YouTube
سبق حائل | صحيفة إلكترونية???????

جديد الأخبار
جديد المقالات

مدار للسياحة

مجمع الأهلي

الدرسوني

الصفا

التميمي ميقا ماركت

آبار حائل

القافلة للسفر والسياحة



20-08-1439 04:31 PM

( كانت حـــايــــل أيام زمان!!! )- 10


( باللهجة الحايلية)
كانت حايل المنازل طين والسّوقة تراب والسعي مبروك والصلاة فرض عين !!
كانت حايل ظلام بالليل ماتشوف يدك سراج واحد بكل بيت وقازه من وايت فرحان !
كانت حايل جبالها أعيرف وأجاء وسلمى نايفات بسناءٍ مشهود فوق منازل الطين!
كانت حايل حدرى البلاد شرق وسماح غرب و باب غطاط شمال والزبارةجنوب!
كانت حائل آخر إحصـائية شاملة تبلغ مساحتها الإجمالية 115 الف كيلو متر !!
كانت حائل أوّل إحصائية لسكان المملكة سكان منطقة حايل عشرين الف نسمة !!
كانت حايل سويقات ضيقة ملتوية ,وبالليل ظلام خرمس و سباع وضباع مسعورة!
كانت حايل الماء القراح من سماح والثمايل والنساء يروّنْ بمَراوى متعبه مؤلمه!
كانت حايل القربة هى الثلاجة بماء سماح بارد لذيذ والزيرغير معروف ومرفوض
كانت حايل النساء يروّن ماء ملح وهماج للطبخ والنظافة بغطوتهن وعلى رجليهن!
كانت حايل إليا توقف المطر تغور القلبان ويعمْقون حفرالجموم للحاق بالماء القليل!
كانت حايل الخروف بعشرة والبعير بخمسين ريال وكيس الرز بسبعة وقليل وارده!!
كانت حايل بعيد الضحيّة يشبعون لحمْ وحميس وتبع لذيذ والفرحه بعيديْن زمانى!
كانت حايل يوشْقون لحم الضحيّة يخلط بالملح ويعلّق على حبال قبل لفوة الكهرب!!
كانت حايل المواصلات حميروبعارين وقليل عددها ومشْينا على رجلينا مع الجادّة!!
كانت حايل الفلا ليح إنتاجهم بجهودهم ونخيلهم بعافية وخضرة الصيف فاكهة لذيذة
كانت حايل دكاكين مبروكة حال ولاهوأكيد متوفر ماتشتهيه النفس من المرغوب !!
كانت حايل قبل ريال العز السعودى عملة الشوشى الفرنسى ,والمجيـدى التـركى !!
كانت حايل المقايضة أكثرتداول نتيجة الفقر المدقع واللى عنده ذهـب ملزوم يكنزه!
كانت حايل جداد التمر موسم كأنه عيد والفقيريرزق والبيع بزبيل وسطل ومرواة !!
كانت حايل الحجاج على ظهورالبعارين شهر ذهاب وإياب وهنى من عاد سالم غانم
كانت حايل الحجاج تهلكهم السيول وتيهة الطريق وهروب الرواحل والعطش!
كانت حايل الحجاج يجيبون هدايا صفّيرومزمار وسباح وحقاق ملبّس ومسوايك.الخ
كانت حايل إليا سال شعيب الأديرع يحجز الرايحين والجاييـن اكثرمن خمسة أيــام!
كانت حايل إليا مات فقيدهم العزاء بالمقبرة وبعد صلاة العصر بحدا قهاوى الجماعة
كانت حايل وقراياها قهاوى مفتوحة للضيوف معروفٌ اصحابها والنّعم بالجميع!
كانت حايل عروسها بليالي الصيف الجماعة يشاركون بلياعشاء والكرمة من باكر!
كانت حايل بالشتاء إليا طلعت الشمس يتدفون بالمشاريق أجسادهم فاقده للتدفئة!!!
كانت حايل أسواق برزان والمسحب والمقصب والحراج والتجارة زمان الصمت !!!
كانت حايل الضيف والطرقي يوجّبُون بكرم حاتمى ٍ أصيل والفقر يعقبْ ويخسااا !!
كانت حايل شبابها أهل فزعه وحميّة, والجميع يحصّلون والكسل مخفوس خشْمه!
كانت حايل الليل سُباتا والنهارحزم ٌوعزمٌ حتى النساء شقرديات يساعدن الرجال!!
كانت حايل سكّانها أهلها هم اللى يبنون ويحرثون ويحطْبون ولا بهْ متسول يتحرى
كانت حايل من بناء بيت طين لزوم فطوروغداءوعشاء العمّال على الجماعة داريّة!
كانت حايل لبس البشت فرض عين على كل رجل يصلى الجمعة أويدخل السوق!!
كانت حايل الكل يسعون بعيشة يومهم مايجدعهم إلاّ الليل سبحان رازقهم ومعافيهم
كانت حايل اللى مايصلى الفجرمع الجماعة النوّاب يحرقون بغترته ومايسلّمْ عليه!
كانت حايل القرآن يدرّس بالمساجد مع السنّة النبوية رغم الفقروالفاقة والحاجة!!
كانت حايل مبلية بالأميّة المؤلمه حتى إنفتح العهد السعودى بنور العلم والإيمان!!
بقية المقال بالعدد القادم إن شاءالله .................................


بقلم الأستاذ :علي الساير .


تعليقات 0 | إهداء 0 | زيارات 10796



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


علي الساير
علي الساير

تقييم
1.15/10 (7 صوت)


Powered by Dimofinf cms Version 3.0.0
Copyright© Dimensions Of Information Inc.

تركيب وتطوير : عبدالله المسمار